غياب التميز في الأردن

Madas — Tue, 16 Feb 2010 06:14:52 +0000

احد الأسئلة الي شغلت بالي في الأشهر الماضية هو ” ليش ما في عندنا اي نوع من انواع التميز في الأردن؟” ، يمكن عندنا تميز بسيط على مستوى محلي او اقليمي، و عندنا قصص نادرة كل فترة و فترة مثل شباب مكتوب، بس ما وصلنا للعالمية في التميز في اي مجال علمي، ادبي، ثقافي.

ما بعرف من وين ابدأ في الجواب، و لكن بتحضرني حادثة حصلت قبل كم يوم معي، و اللي يمكن فتحت باب لعديد من الأسئلة شعرت انه يمكن الجواب على سؤالي بيكمن فيها.

اختي، عم بتحاول تعمل مبادرة رياضيه حتى توصل الأردن على الخارطة العالمية في كرة القدم. هي قدرت تشبّك مع اهم نوادي كرة القدم في فرنسا. قدرت تقنع مجموعه من اللاعبين المحترفين انهم يجوا من فرنسا حتى يختاروا مجموعة من الأطفال الأردنيين من عمر 9- 14 سنة حتى يدربوهم و بعدين ياخدوهم حتى يتنافسوا بفرنسا، و بعد سنتين بوصلوهم لمرحلة انهم ينافسوا بكأس دانون للأطفال. و لما يوصلوا على عمر 17 سنه ممكن يكون صار عندنا فريق قادر انه يتنافس على النطاق الدولي.

المهم، حتى تقدر تغطي تكاليف المدربين، اضطرت انها تفرض مبلغ مالي على الدورة تقريبا 120 دينار. كلنا متفقين انه هذا عائق كبير، لأنه على طول بيستثني 95% من اطفال الأردن اللي ما عندهم القدرة على المشاركة لأنه هم ما بلحقوا يوصلوا لأخر الشهر و اللي فيهم بتكمن الموهبة الحقيقية في كرة القدم.

ما علينا، لقت جهه داعمه، قررت تشرك 10 من اولاد من عمان الشرقية. الأطفال الحافيين اللي بيلعبوا كرة قدم ببوط كبير لأنه ما عندهم بوط، او اللي بييجوا بفردة بوط مختلفة عن التانية و مع هيك بضلوا يلعبوا.

واحدة من أمهات الأطفال الأغنياء سألتها

” من اي مدارس اخترتي الأطفال؟” و ايلينا جاوبتها ” من مدارس مختلفة؟” الأم رجعت سألتها
” المهم كلهم من مدارس خاصة؟ فردت عليها ايلينا “لأ”. فقالت الأم ” اه…اذا ما عجبني مستواهم بترجعيلي المصاري؟” قالتها ايلينا دخلت بمونولوغ طويل مع السيدة تحاول تقولها انه اذا بدنا نوصل الأردن لمرحلة البطولة العالمية، مش لازم يكون عندنا هذي الطبقية، و مش لازم الفرص يكونوا حكر على الأغنياء فقط.

برأي هذا الحديث هو في صميم الجواب على السؤال الأصلي. ما عندنا تميز لأنه نحنا كشعب وقعنا في فخ الطبقية، بحيث انه شبابنا و اطفالنا انحشروا ما بين مصالح و اطماع الأقلية الغنية، و افكار و افكار وسلطوية الغالبية التي بتكون مجتمع طبقي ذكوري اللي عم يتوجه نحو التطرف الديني و المحافظة.

قبل ما اكمل بحب اوضح الصورة الموجودة، لفت انتباهي لإلها نسيم من السوسنة السوداء. صورة مأخوذة من من مدونة لكاتب اسمه دانييل كويل و اللي كتب كتاب اسمه (ذا تالنت كود) او شيفرة التميز، كتاب بوثق التميز و الموهبة و بيشرح كيف بصير عند الإنسان تميز. الموضوع سهل: التدرب! الإنسان لما بيتدرب بيكون مادة معينة، و كلما تدربت بتزيد هذي المادة، و كل ما زادت بزيد تميز الإنسان.

الصورة هي في كينيا، اخذها دكتور رياضة اسمه راندي ويبلبر. في هذي الصورة في اثنين من افضل العدائين عم بيتدربوا، بيلحقهم طفل صغير عم بيركض للمدرسة. لحظة صغيرة بتوضح ليش هذي المدينة الصغيرة بتنتج من اهم العدائيين في العالم.

السبب هو كالتالي، العدائيين المهمين عندهم فرصة للتدريب و التميز. هم بيبدأوا بالشارع بس بعدين، دائما بيلاقوا الفرصة انهم يعبروا عن مواهبهم. الفرص ما بعد التدرب مش حكر على الأغنياء زي ما بصير في الأردن. و السبب الثاني هو انه بسبب وجود هذي المثل العليا، الأطفال بتأثروا و بصيروا بدهم يقلدوا. فمثلا هذا الطفل، لما يكبر ما عندي اي شك انه رح يصير بطل عالمي في الركض.

خلينا نرجع للأردن، برأي انه من اهم الأسباب اللي عم بتأخر الفرص ل95% من الشباب هي الطبقية و المحسوبية و الواسطة.و الفقرو عوائق كتير غيرها. لما يكون عندنا اطفال مميزين، بينحرموا من فرصة انهم ينمّوا مواهبهم لأنه هم مش بمدارس خاصة، صار عندنا عائق. لما بيختاروا لأي فرصة، الأشخاص اللي عندهم علاقة بلجان التحكيم صار عندنا عائق. لما كل الفرص تكون مرتبطة بمبالغ ماليه كبيرة في بلد، الغالبية فيها ما بتوصل لأخر الشهر، صار عندنا عائق. و لما الشاب المميز بيكون لازم يترك موهبته لأنها ما يتطعمي عائلته، صار عندنا عائق. و لما الأمور بينحكم عليها من منظرو الهوية و الأصل و المنبت و العرق و الدين صار عندنا عائق. و لما المواطن ما بينعطى فرصة انه يعبر، و بيتخوّن لما يعترض صار عندنا عائق، و لما الشاب اللي مش لابس الملابس الصحيحة او اللي ما عنده الهوية الصحيحة ما بينعطي الفرصة صار عندنا عائق. و لما ما بكون عندنا مساءله و شفافية صار عندنا عائق. و بهذي الطريقة بنقضي على التميز بمهده

الفكرة هي عندنا بالشوارع و القرى البعيدة و المخيمات المليانة و الحواري المنسية مئات المواهب المدفونة، و اللي ما بكون الها الفرصة انها توصل، و بالتالي اطماع الأغنياء، و اجندات الحكومة و السلطة الإجتماعية لمجتمع محافظ، بتحرم الأردن من فرصة التميز. .

House of Curiosity... » تميز، كرة قدم، طبقية، موهبة

غياب التميز في الأردن