السبب الأول، انه نحنا بنعيش في مجتمع ذكوري بيسمح بتعدد الزوجات (كتير في رجال بيتركوا زوجاتهم حتى يتزوجوا ستات اصغر، او احلى او اغنياء اكتر…). المرأة بيبقى عندها شعور بعدم الأمان، لأنها بتحس انه يمكن استبدالها بسهولة . وحتى لو كان هذا ما بيأثر علينا بشكل مباشر، نحنا بنكبر و نحنا بنراقب أمهاتنا ، وعماتنا و خالاتنا وجداتنا و جارتنا، اللي يمكن كانوا تضرروا من هذا الموضوع، وتعلمنا و استوعبنا مواقفهم و تبنيناها من سن مبكرة. مثلا جدتي طول عمرها بتقول ما تأمني لصديقة، السبب فعليا هو انه هي شهدت كيف ابوها اتزوج على امها واحدة من معارفها و شهدت كل الحزن اللي تعرضتله امها، فاستوعبت هذا الشعور و نقلته لبناتها و حفيداتها. !

اما السبب التاني فهو موضوع موارد. في الأردن نسبة الذكور للإناث متساوية تقريبا ، و لكن بيحكمنا نظام اجتماعي معقد، مبني على المنفعة و القيمة الإقتصادية. و بالتالي الطبقات الإجتماعية الأعلى بالعادة ما يتزوجوا من الطبقات اللي اقل منهم. اللي بصير هو انه عدد الشباب و البنات غير متوازي في كل طبقة على حدا و زيادة على هيك الشباب بيتركوا الأردن بسبب وجود موارد افضل برة او بسبب هجرة الأدمغة، او لأسباب اقتصادية واجتماعية متعددة. البنات من الناحية التانية بيبقوا في الأردن، و عدد الشباب المناسبين بيصير اقل، و بالتالي لازم السيدات يتنافسوا على الموارد،. 

البنات الصغار بيتعلموا أهمية انه يكون شكلهم انثوي و اغرائي، و بيصيروا يتنافسوا على الشكل الحسي و على المستوى المرئي وعلى كل المستويات. و قبل ما البنت تدرك شو اللي بصير، بتكون تعلمت انها ما تثق بكل النساء في مدارها. الشي اللي بحزن بالموضوع هو انه هذا بيتناقض مع قدرة المرأة المميزة في تشكيل علاقات، اذا بنطلع حولينا بنشوف انه المرأة في كثير من الحالات هي اللي بتحافظ على العائلة والمجتمعات المحلية متماسكة… وهذه الغيرة والمنافسة هي اللي بترجع مجتمعنا لعصر رجل الكهف