House of Curiosity... » الزواج

المرأة و الراتب: الجزء الثاني

Madas — Tue, 11 May 2010 04:00:28 +0000

سيناريو

بحب ابني سيناريو حتى اسلّط الضوء على كيف بتكون الأمور من منظور المرأة الأردنية…

عروس جديدة. كل شي جديد، بيت جديد، اشياء جديدة، تجربة العيش مع رجل غريب لأول مرّة، تجربة العيش بعيد عن بيتها و اهلها اللي كانت بينهم محمية و مغمضة. … لما تكون الأمور لسا محرجة، و في كتير حكي لسا ما انحكى، و الإثنين لسا لابسين الأقنعة ، العريس بيقترح انهم يفتحوا حساب مشترك في البنك، و هي بتقبل عن طيب خاطر.

المهم بينفتح الحساب المشترك ، وكل كم أشهر، بيتحول المصاري لحساب الزوج ، هو الحساب الرئيسي الذي بيدفعوا كل شيء… قرض المنزل ، قرض السيارات ، وبطاقات الائتمان، عفش البيت، و بعدين مدارس الأولاد… ما بيناقشوا ولا شي، لأنه موضوع المصاري هو واحد من كتير قضايا راحت فرصة نقاشها ،…و بعد كم شهر من الزواج، لما يصير في عشرة و محبة، بصير حتى التفكير في الموضوع محرج.

عم بكتشف انه موضوع المصاري موضوع كتير معقّد. الناس ما بتحكي فيه، و بتتجنبه. قريبتي سلمى، كانت بتشرحلي كيف انه لبعد سنين من ما اتزوجت، كانت تروح لأبوها تاخد منه مصاري، بالرغم انه زوجها كان وضعة منيح. زوجها انجن لما عرف، و لما سألها قالتله انه هي كانت تستحي تطلب منه. هلأ بعد سنين من الزواج بتقول انه هلأ ما بتستحي ابدا، بالعكس كتير ماخدة راحتها، و بتطلب من زوجها بكل جرأة. بس كانت الطريق لتوصل لهدا الحال كانت طويلة و صعبة. و بتقول انه هي بتتمنى لو انه حدا فهمّها أنه لازم اتناقش هذا الموضوع مع زوجها من قبل ما يتزوجوا.

شو رأي الجدة في هذه المسألة؟

أتذكر عشية زواج واحدة من عماتي. دخلت على غرفه و انا مش عارفه، اني دخلت على مؤتمر مغلق بين العمات المتزوجات، و ستي و العروسه! كانوا بحاولوا يعطوها خلاصة خبراتهم في الحياة. ما سمعت كثير ، لأنهم كشوني برّة الغرفة من اوا ما انتبهوا علي. بس سمعت جدتي بتقول… “راتبه الك وراتبك لك! ما تبقي هبله و تعطية مصاريكي. بدّبري حالك براتبة و لما تحتاجوا المصاري لشي مهم بتلاقي المصاري المخباية .” عمتي اشتغلت و خبت مصاريها لسنين، و فعلا يوم ما قرروا انه يشتروا بيت، زوجها اتفاجأ انه على الأقل نصف سعر البيت كان موجود …

الشي اللي بضحك بالموضوع، انه زوجها هو مالك البيت… هو شعر انه مش لائق هي اتروح معه يسجلوا البيت، و سبحان الله البيت اتسجل بإسمه لحاله.

وجهة نظر تانية

قبل كم سنوات كنت في الولايات المتحدة، شفت اثنين من اصحابي اللي كانوا على وشك الزواج. بتذكر المناقشه اللي عملناها وقتها كتير امنيح، حتي اني كتبت عنها و قتها. بس باختصار كانوا مش كتير مبسوطين من بعض يوم ما شفتهم، كانوا جايين من قعدة بالكنيسة وقتها. قبل ما اي حدا يتزوج، كانت الكنيسة بتطلب منهم انه يحضورا جلسات مع ناس خبراء في امور الزواج. بيحكوا عن اشياء ممكن اتأثر على حياتهم، مثل الأمور الماليه، الممتلكات، اذا الست بدها تشتغل او تقعد بالبيت، قديش بدهم اولاد، وين بدهم يسكنوا، كيف العلاقات مع عائلاتهم بدها تكون … اصحابي عرفوا وقتها انهم ما ناقشوا موضوع المصاري، و الأهم من هيك اكتشفوا انهم مش متفقين على هذا الموضوع…. هم اتزوجوا بالأخر بس مش قبل ما حطّوا خطة مالية كتير دقيقة. هلأ هم بيعيشوا حياة كتير أنيقة… وهم الإثنين كتير واعيينن انهم ما بقدروا انهم يحفاظوا على نمط حياتهم ، إذا واحد فيهم توقف عن العمل ، أو إذا واحد منهم قرر انه ما يشارك بدخله….

السؤال اللي بيطرح نفسه هون هل يجب ان تشارك الزوجات بدخلهم، و شو هي احسن اليه حتى انه حقوق الطرفين تنحفظ و يعيشوا بأفضل طريقة ممكنه بهذا الدخل؟

هل الرجل الأردني بيخاف من الإلتزام العاطفي؟

Madas — Wed, 06 Jan 2010 05:00:48 +0000

في قعدة بنّاتية، كانت سها عم بتشكي من نوبات الحساسية و الحرارة و السعال الحاد ياللي بتصيب رفيقها الكتير “كول” كل ما ذكرت موضوع الزواج. (النوبات اللي كانت بتحكي عنهم كتير شبيهين بالنوبات اللي كانت تصيب والدي، لما كنت انا و اخواتي نذكر اسم ولد و نحنا صغار! يمكن هذي هي ردة فعل الرجال كلما حوصروا في زاوية؟… مجرد فكرة) ما علينا.. بنفس الوقت، كانت ديمة عم بتشكي من خطيبها لمدة سنتين اللي عم بنكِّد عليها حتى تترك شغلها، وتكرس السنوات ال 10 الجايين حتى تولد 3 او 4 اطفال. بيقول خطيبها انه بتقدر ترجع تشتغل لما الأولاد يروحوا على المدرسة. هذه المفارقة دخّلتنا في نقاش طويل حول الرجل الأردني و كيف نظرته للالتزام

بعتقد انه الرجال والنساء يبنظروا للإلتزام من زوايا مختلفة… نحنا (البنات) بنلعب عروس و عريس و بيت بيوت مع اولاد الجيران من ايام الطفولة… بنكبر ونحنا بنفكر انه لما نكبر بدناعرس كبير، و بيت حلو، و زوج لطيف بيخلي كل بنات المدرسة يغاروا. بدنا مجموعة من الأطفال الحلوين، بيركضوا حولينا متل الجاجات! (مش كل البنات بفكروا هيك بس كتير منا هيك بفكروا) و اكيد بهدي الصورة الملونه، الالتزام بالنسبة للبنات بيكون شكله كأنة إنجاز، أمن، راحة و تحقيق لكل هذه الأحلام المزروعة في عقولنا. و طبعا المجتمع بيلعب دور رئيسي بهذا التفكير .

بالنسبة للشباب الإلتزام شكله مختلف تماما. الالتزام معناه “مع السلامه يا حريتي” الشاب لما يتخرج من المدرسة او الجامعة ما عندة غير خيار واحد، هو انه يشتغل و يكون ناجح. يعني الرجل بجهتنا من العالم ما بيقدر يقعد بالبيت بلا شغلة و لا عملة . اذا كان عزابي بيفكر انه لازم يأمن مستقبلة و اذا كان متزوج و عنده اولاد، لازم يفكر كيف بده يعيشهم. و هيك لما بتيجي فكرة الإلتزام بتيجي صورة عُمر من الكفاح و الشغل و الشقى… ومع المطالب المادية العالية اللي البنات بطالبوا الشباب فيها… ما اظن انه الإلتزام شي لو كنت شاب كنت بتمناه.

عملت بحث صغير في نفسية رجل الكهف حتى احاول افهم خوف رفيق سها من الإلتزام، و بنفس الوقت رغبة خطيب ديمة القوية لتحويلها لمصنع اطفال…

لازم اتطولوا بالكم معي. الفقرة الجاي مش كتير حضارية، بس مثيره للاهتمام. رجال الكهوف كانوا متعددي الزوجات. تعدد الزوجات كانت آلية للبقاء… لازم ينشروا بذورهم حتى يستمر الجنس البشري و عشان هذا السبب الستات كان لازم يولدوا اطفال اكتر. الغريزة اللي دفعت رجل الكهوف بعيد عن الالتزام “الزواج الأحادي” و خلته يتزوج عدة زوجات هي نفس الغريزه اللي بتتحكم بصديق سها…بس بما أنه العالم تغير، والحضارة سادت والرجل ما عاد بإمكانه يتذرع ببقاء البشرية كسبب انه يتزوج عدة سيدات… الغريزة نفسها اللي بعدها متأصلة في الرجل، هي اللي بتدفع خطيب ديمه انه يجيب مجموعة اولاد!

شو رأي الشباب بالموضوع؟

محمد ، 29 سنة، ادارة ، متزوج

انا ما بعتقد انه الرجل بخاف من الإلتزام. اذا لاقى الشخص المناسبة، على طول بيلتزم معها. اصلا اذا وصل لعمر معين و ما كان في حدا بحياته، بيشعر انه مش مستقر و بتكون نفسيتة مش مرتاحة

خليل، 25 سنه، عامل بمطعم، عزابي

” المشكلة انه البنات في عمان كتير مفزلكين! كتير بتطلبوا، بدها راتب كتير عالي، و بدها سيارة اخر موديل، و بدها فيلا كتير كبيرة، و ما بدها تغلب حالها بأي اشي. فالشاب بيقول شو بدي بوجع هالراس؟”

طارق، 35 سنه، تكنولوجيا المعلومات، عزابي

” خلينا ننسى المتطلبات المادية شوي. المشكلة هي انه البنات بفكروا بالرجل زي كأنة من مخلوق من حديد. يعني البنت بدها الرجل يدير باله عليها كأنه اب مش كأنه شريك. زي كأنها بتطلع من بيت ابوها الأول لبيت ابوها التاني”

رامي، 24سنة، تاجر،عزابي

“معيش احلق! وين التزم؟”

لؤي 19 سنه، طالب جامعي، عزابي

انا جاهز!