House of Curiosity... » التعليم

جائزة الملكة رانية للمديرالمميز

Madas — Sun, 09 Oct 2011 05:40:17 +0000

اندعيت حتى أتحدث عن احد مدراء المدارس المتقدمين لجائزة الملكة رانية للمدير المميز. في البداية كان عندي توتر انه لازم أغير روتين الخميس و هو عطلة نهاية الأسبوع بالنسبة الي و بكون في انتظاره على أحر من الجمر.

وصلت المدرسة ، و أنا ما رح أذكر اسم المدرسة أو اسم المدير، بعد جهد و ضياع و لفلفة. حقيقة أنا رحت عدة مرات للمدرسة و لكن ما زلت غير متأكدة من الطريق. لما وصلت للقاعة، اكتشفت انه كان في عدة أشخاص غيري، تم دعوتهم لنفس السبب. كان هدف وجودنا هو انه نتحدث عن المدير كجزء من أحد الخطوات في آلية تقييم المتقدمين للجائزة، عن طريق تقديم أدلة واقعية تأكيداً على مصداقية الطلب.

اللجنة اللي كانت موجودة كانت بتتسم بالمهنية و اللباقة و الاحتراف. أعطتنا نبذة سريعة عن تاريخ الجائزة، ووضح المتحدث انه هذا المدير كان عم يتنافس مع 12 مدير تانيين، تأهلوا لمرحلة الزيارة الميدانية. ووضحوا انه لازم نحكي عنهم سواء بالحلو أو بالمر حتى نساهم في استكمال التقييم بشكل متكامل.

بدأت أسمع الناس شو بيقولوا و انتبهت بعد فترة إني ما كنت عم بتنفس. شعرت اني حابسة نفسي و بدعي من كل قلبي لهذا الرجل الطيب. شعرت كم هو لطيف انه شخص يكون في مكانه، عم بسمع شهادات ناس ساعدهم أو كان في بينه و بينهم علاقة مهنية أو شخصية خلال حياته. هو كان جالس بهدوء و بثقة و كان مبتسم طول الوقت.

لما كان دوري، حكيت عنه بكل صدق و بكل محبة و احترام. من الأشياء اللطيفة اللي انحكت عن هذا المدير المحترم كانت:

كيف انه من يوم ما مسك المدرسة عمل انضباط للشباب اللي كانوا طول الوقت واقفين عند مدرسة البنات المجاورة (لسعادة )مديرة مدرسة البنات اللي كانت مش عارفة شو تعمل)

اما الشيخ اللي بزور المدرسة حتى يزودها بالزعتر فقال جملة لاذعة و لكنها بتعكس واقع و فكرة يمكن كتير ناس بفكروا فيها بس ما بيحكوها بصوت عالي و خاصة بهيك موقف. قال كيف انه المدرسة ممتازة لدرجة انه خسارة فيها تكون مدرسة حكومية!

أحد الاباء قال انه ابنه حصل على علامة كتير عالية بالتوجيهي. و هو لما وصل للتوجيهي بدأت المدارس الخاصة تعطيه عروض مالية مغرية حتى ينضم لمدرستهم، لكنه رفض و فضل يبقىفي مدرسته. الاب بيعزي انتماء ابنه للمدرسة للمدير اللي كان يعمل جهده انه يكونوا هدول الشباب أفضل شي. و فعلا طلابه جدا متميزين.

هذي التعليقات لفتت انتباهي لتحديات نظام التعليم عندنا، و هو بالنسبة الي مصدر جميع الشرور. اذا تحسن، انحلت جميع مشاكلنا المجتمعية و الفردية. المدارس الحكومية تعتمد على نظام مركزي مش مرن و بالتالي ما في أي مجال للتنافس و محاولة التشبيك مع المجتمعات المحلية حتى يحصلوا على دعم سواء مادي أو عيني. و كل قرار بعملة المدير لازم يمر بسلسلة طويلة من البيروقراطيين و يمكن أي واحد من هاي السلسلة يقرر انه هذا اليوم هو معصب او مش على باله يساعد و بالتالي بتتعرقل المهمة في مكان و الله العليم يوصل المدير ولا ما يوصل لمكان العقدة

أما المدارس الخاصة بتمص دم المواطن و بتستهدف المواطن الغني. و بتبقى بتزيد و بتزيد بهالقسط. و بالنتيجة عم يتخرج طلاب عندهم أزمة هوية و يعتقدوا انه هم أفضل من طلاب المدارس الحكومية لسبب بسيط و هو انه هم أهلهم بيقدروا يدرسوهم بمدارس خاصة. الشعور مش مبني على شعور بالمواطنة و لا شعور بالاستحقاق ولا بالمهارات، مبني بكل بساطة على الوضع الاقتصادي اللي الطالب ما اله أي قرار فيه. إلا يوم التوجيهي لما يشوفوا المدارس الخاصة انه في طلاب مميزين ببدأوا يغروهم و يدفعولهم حتى يكون اسمهم إنهم تخرجوا من عندهم. بغض النظر عن الجهد اللي عملة الطالب و أهله و المعلمين والمدراء طول 10 و لا 11 سنه في مدرسة حكومية.

الحقيقة انه شعرت بقيمة الجائزة وعرفت كم هي فعاله لتكريم فئة من المواطنين اللي بكدوا و بكدوا و يمكن هذي الجائزه هي الطريقة الوحيدة اللي بشعروا انهم اتقدروا

وعد جدتي المقدس

Madas — Tue, 08 Dec 2009 04:35:46 +0000

For English, please read here

الموضوع الأصلي انكتب باللغة الإنجليزية بتاريخ 4\5\2005.

كنت عم بتحدث مع ستي قبل أسابيع، و من كل وسائل الإتصال الحديثة، كنا عم بنحكي عبر برنامج السكايب.. و

السبب هو انه ستي كانت في زيارة خاصة لبابا بالسعودية. و طبعا ما حدا في العيله كان فاهم سبب هذي الزيارة السريه و لا حتى بابا نفسه! بس كل اللي بنعرفه هو أنه أكيد في سبب كتير معقد، لأنه البساطة مش من سمات تيتا !

ما علينا

تيتا واحدة من أذكى السيدات اللي عرفتهم بحياتي، …. وبالرغم من أنني قضيت كل حياتي بثوره عليها و على سلطتها وسطوتها و على كونها الشمس اللي بتدور حولها عائلتي، ما بقدر الا اني اعجب بهدي السيدة الصعبة.

هي كتير شجعتني عشان اكمل دراسة الماجستير، قالت لي أنه التعليم فرصة كتير ذهبية ما صحتلها بالرغم انه كان حلم حياتها انها تكمل تعليمها. هي اضطرت تترك المدرسة على عمر 11 سنه، لأنه كان عيب للبنات من طبقتها الإجتماعية انهم يدرسوا أو يطلعوا من البيت لما بيوصلوا سن البلوغ.

و زي كتير بنات بوقتها… تزوجت على 14 سنة

جدي الله يرحمه (توفى قبل اكتر من 20 سنه)، كان رجل كتير شديد و صارم . يوم من الأيام رجع على البيت قبل بأوانه ولقاها بتقرأ مجلة…

و يا ليلي..

كانت هذي مصيبة المصايب. قالها لو بحياته كلها شافها بتقرأ مجلة مرة تانية يا ويل ويلها! رح تكون هذي اخر

ليلة بتقضيها معه كزوجته.
قالت له تيتا بتحدي : “معناه رح استنى لما تموت عشان ارجع للمدرسة! “

و مات جدي بعد سنين طويلة

بعد فترة الحِداد ، ما لقينا غير هالحَجة لابسة ملابس الطلعة، و شادّة حيلها…
- “وين يا مسهّل؟”
” والله رايحة اسجل بالمدرسة!” -

تيتا صارت تروح كل يوم على المدرسة . لحد ما وصلت للصف التامن. كانت تجنني عشان اساعدها بالواجبات و اسمعلها. هي اليوم ما بتقرأ كتير. بس بتقول انها كتير بتكون فخورة بحالها لما تمسك القرأن الكريم و تقرأه. مرات بحس انه هي ما بتقرأ قد ما بتسمّع من ذاكرتها…

بس عن جد مش مهم.

المهم انها استخدمت وسائلها الصغيره ( اسلحة الضعفاء) عشان تقدر تحقق حلم بقي معها كل حياتها. و الشي الوحيد اللي بقدر اقوله عنها، انها انسانه مدهشه!
بس افكر باللي حققته بأسلحتها الصغيرة، بشعر بمدى عظمتها. هي قدرت تبني عمارة مطله بجبل اللويبدة. من مصاري هي جمعتهم قرش فوق قرش. و قدرت تبني هذا البيت لحالها، و توقف للعمال، و تساعد و تحمل. بينما جدي ،الشديد و الصارم كان منهك من المرض.

ربت خمس بنات، و ما هديلها بال حتى علمتهم كلهم غصب عن كل الناس اللي قالولها انه عيب البنات يتعلموا. جوزتهم لشباب هي اختارتهم برضاهم وما تركت مجال للعائلة انهم يتحكموا في مصير بناتها. ووعدت حالها انه كل اولادها يتعلموا طب، لأنه برأيها كانت هذي أكتر مهنه محترمة. غربتهم و شدت عليهم و قاست معهم لحد ما فعلا نجحت بتحقيق وعدها.

ستي متلها متل كل الستات الفلسطينيات اللي تهجروا و تبهدلوا و قدروا يبنوا حالهم و حياتهم من ولا شي. و هدول السيدات القويات بيستحقوا انه نوقفلهم بإحترام و محبة و تقدير لأانه كل واحدة فيهم هي مثل بحد ذاتها

أنا دائما معجبة بالستات القويات، القادرات. و اكيد أنا كتير فخوره بسيدات عائلتي القويات !