غياب الثقافة الجنسية، أسعار محددات النسل والعلاقة ما بين الوضع الاقتصادي وعدد الاطفال
كنت بسمع الراديو قبل كم أسبوع و كان محمد الوكيل عم بأنب أحد المواطنين لأنه عنده 22 أو 28 طفل و هو على باب الله. و بالرغم إني بتفهم من ويم جاي محمد الوكيل (بس في هذي الحالة، لأنه في كنير حالات ما بقدر أفهم عليه ولا شو بده)، محمد الوكيل لفت انتباهي لموضوع العائلات اللي فيها عدد كبير من الأطفال و خاصة بعد النقاش الطويل و المش لطيف اللي دار حول موضوع أحمد مطارنة، و خاصة أنه في بعض الناس وصلت فيها الوقاحة تحكي انه بيستحق الموت لأنه عندة 13 طفل.
موضوع الأطفال الكثر موضوع شائك و حساس، و بشعر انه الشخص اللي مش فاهم لبش عدد الأطفال بزيد مع تدني الوضع الاقتصادي في الأردن، شخص مش كثير فاهم الثقافة الاقتصادية و الدينية و الاجتماعية اللي في الأردن و مش كثير عنده فهم لإنسانية المواطن الاردني
أنا من الأشخاص اللي بحب انه العائلة يكون فيها كثير أطفال، و السبب هو إني كبرت في عائلة فيها 5 أطفال و كثير كانت طفولتي سعيدة. ومن أكثر الأشياء إلي تسعدني في الحياة، هي لما نتجمع كلنا عند الأهل و بعتقد انه أنا إنسانه كثير غنية بسبب محبة عائلتي. ومع هيك، بفهم انه الحياة ما عادت مثل قبل و انه اليوم إذا الواحد حابب يضمن حياة محترمة لأولاده، لازم يحسبها بدقة، و لازم يعرف كيف ينظم النسل حتى يتأكد انه على الأقل كل أولاده رح يصحلهم حياة كريمة و تعليم جيد.
ما علينا
بحب أرد على التعليقات الاستفزازية للدفاع عن الناس اللي عندهم أولاد كثر.
و لكن بحب أشارككم بتجربة شخصية صارت معي في المدرسة، و أنا ذكرتها عدة مرات من قبل. على وقتي الثقافة الجنسية كانت في منهاج صف تاسع. كانت هذه الثقافة بتنعاد في صف التوجيهي علمي في مادة الأحياء. في صف تاسع معلمتنا قررت انها ما تعطينا هذي المادة لأنها كانت “قلة أدب”. يعني البنات اللي كانوا بالعلمي، كانت عندهم فرصة إنهم يتعلموا، أما بنات الأدبي فخلينا نقول “راحت عليهم”
هذه المعلمة درست لمدة 20 عام، يعني عم بنحكي عن 20 جيل ما يعرفوا أي شيء عن الثقافة الجنسية. و صدقا أنا كنت في مدرسة محترمة. السؤال إذا كان هذا الوضع بمدرستي، فكيف كان الوضع بالمدارس الثانية؟
النقطة اللي بحاول أوصلها، انه نحنا كشعب ما عندنا ثقافة جنسية، و بالرغم من وجود الانترنت إلا انه الانترنت بتم استخدامه من قبل الشباب و مش من قبل جميع فئات الشعب الأردني. فأول نقطة في مرافعتي للدفاع عن العائلات الكبيرة هي انه في تقصير شديد من الحكومة في عمل توعية جنسية. و بسياق مختلف، هذا أحد الأسباب اللي بخليني أكون ضد الحملات اللي بطالب في محاربة المواقع الإباحية. حتى يصير في عندنا نظام تعليمي بيعطينا المعلومة بشكل محترم، لازم يكون في بديل للشباب و الشابات انهم يتعلموا!
النقطة الثانية في مرافعتي هي انه نحنا ثقافتنا الاقتصادية بتشجع على الأولاد الكثر. الأولاد بيشتغلوا و بيصرفوا على العائلة في ظل غياب نظام عادل بيضمن الحد الأدنى المطلوب للحياة للمواطن الأردني. الاستثمار الأفضل في حياة المواطن هو أولاده. هم اللي بيصرفوا عليه لما يكبر، هم اللي بدفعوا سعر طعامه و شرابه و فواتيره الطبية. المواطن عندنا بيشتغل كل حياته و بيدفع 16% ضرايب بالإضافة إلى ضريبة الدخل و لما بيكبر ما بلاقي أي مقابل. و بحب أرد على السؤال ليش ما برتب أموره من هو صغير، بالجواب أنه ما بيعرف و ما بيقدر لأنه الحياة كثير غالية و نظامنا التعليمي كثير ممتاز! فبالتالي حتى ما يجد نفسه في الشارع بجيب أكبر عدد من الاطفال، بأمل انه واحد يكون محترم و يدير باله عليه. و بالمناسبة هذه الطريقة فعالة اليوم و كانت فعاله على وقت أبوي، و على وقت أجدادي من قبله. و بعتقد انه في الأردن أكبر عدد من الأعمال هي أعمال عائلية. من أصغر دكانه لأكبر شركة فالسؤال اللي بيطرح نفسه، لشو التغيير؟
النقطة الثالثة هي انه كمان الثقافة الدينية بتشجع الأولاد. في حديث عن الرسول بيقول “تزوجوا الودود الولود، فأني مكاثر بكم الأمم يوم القيامة” الدين يشجع على الإنجاب، و في مجموعة كبيرة بتعتقد و بتؤمن أنه تحديد النسل حرام، و استخدام أي محددات بتمنع الحمل و الولادة كمان حرام. و بالمناسبة هذا الموضوع لا يتوقف عند الدين الإسلامي، كل الأديان بتمنع استخدام محددات النسل و بتشجع الولاد الكثار. الأمه الكبيرة فيها قوة و خاصة بعالم مثل اليوم بتحكمه الأجندات السياسية و الاقتصادية. فبرجع اتساءل كيف بنتوقع من مواطن أردني انه بسترجي يحدد نسله
أخر نقطة بحب أذكرها هي ارتفاع سعر محددات النسل. يعني لما تكون العيلة عايشه على 200 ولا 300 دينار (في الحالات الممتازة)، و يكون الجنس هو أحد الأشياء القليلة اللي بتشعر الإنسان بإنسانيته و بكرامته، و مع هيك سعر أي وسيله وقاية
بالسعر اللي هي فيه. فكيف بنطلب من أحمد مطارنه و غيرة من ملايين المواطنين انه ما يكون عندهم أولاد كثر؟
![IMG_0039[1]](http://farm8.staticflickr.com/7121/6962859922_2342ea8985_m.jpg)
المشكلة بموضوع أحمد مطارنة متل ما انتي حكيتي أنو نحنا تناسينا السبب الرئيسي اللي خلاه يعمل هيك والتهينا بأولاده ال13 حتى نبرر للحكومة اللي عملتو فيه، أحمد المطارنة أب، اب لطفل أو ل13 بيضل أب قبل كل شي
Reply
Madas Reply:
February 8th, 2012 at 16:09
بعتقد دائما هيك بصير، القضايا المهمة بتختفي ورا القضايا الثانوية.
Reply
Thank you for this analysis ; I agree on most of what you have said However i just wanted to draw attention that different birth controls are available in all maternal health centers – مراكز الأمومة و الطفولة – for free …
the issue is about lack of information when it comes to services in additions to the myths surrounding those methods starting of side effects and that they can make you infertile !
Reply
Madas Reply:
February 8th, 2012 at 16:18
Fully agreed, Just to add another dimension to the complicated issue of birth control
Reply