عن شو تحدثنا بلقاءنا مع رئيس الوزارة سمير الرفاعي؟

الأسبوع الماضي، حكت معي سيدة و دعتني للقاء مع رئيس الوزارة. ما بعرف كيف الناس بيشعروا بهيك حالات، بس انا اصابني التوتر الشديد! حسيت احسن كتير لما عرفت انه مجموعة من اصدقائي كانوا معزومين كمان لهذا اللقاء.

يوم الأحد الساعة 12 الا ربع كانا التقينا عند باب الرئاسة في الدوار الرابع. دخلنا على المبنى الفخم. لأول مرة بالنسبه لإلي، و اذا حدا مهتم يعرف، حسيت اني بمحل مهم.

قعدنا في قاعة الإجتماعات. كنا بنمزح و نتضحك. كلنا اصحاب و كلنا بننبسط بس نشوف بعض. ضمت المجموعة احمد حميض، نسيم طراونة، لينا عجيلات، ربى العاصي، ريم مصري و محمد القاق و رمزي تسدل. المجموعو متنوعة بس كتير متجانسة. ( كانت هذي نقطة أحمد، انه يمكن لازم مجموعات مختلفة تكون موجودة في اجتماعات مشابهة)

دخل الرئيس بعد 5 دقايق يمكن و سلم علينا كلنا. رح احاول ألخّص جزء من الحديث اللي دار في الجلسه، الجزء اللي حسيته مهم بالنسبه الي ، لأنه القعدة كانت ساعة و نصف تقريبا. بحب اذكر اني عم بعيد الحديث زي ما بتذكره، و مش بالضرورة يكون دقيق 100%

شعب اردني منقسم على ذاته

بدأ احمد بالحديث عن الفرقة الواضحة في صفوف الشعب الأردني، تحت نظر الحكومه الصامتة. بين انه الوضع خطير، و ما في اب بحب انه ابناؤه يتربوا في هذا الوضع الصعب. و حكى كيف انه في عدم وضوح في خطاب الحكومه، حيث انه الحكومة بتحكي في خطاب، و مؤسسة التلفزيون بخطاب مختلف ووزير الإعلام بخطاب مختلف تماما و هذا الشي بيخلق تلخبط عند الشعب الأردني. و تحدث احمد عن دور التلفزيون الأردني في الثقافه، و كيف انه مؤسسة التلفزيون اصبحت قديمة ، بالرغم من قوتها كوسيلة اعلام.

طريقة تواصل الحكومة الأردنية او بالأحرى غيابها؟

بعتقد انه هذي كانت نقطة نسيم. كان نسيم بيتحدث عن غياب التعليق من قبل الحكومه و عدم تفسيرها لأمور مهمه بالنسبة للشعب. مثلا اللي عم بصير هلا مع الفلسطينيين اللي عم بتنسحب جوزات سفرهم. المشكلة انه الأمور مش واضحة، و الحكومة ما عم بتعلق او بتزود الناس بمعلومات عن الموضوع. و خاصة انه الناس اليوهم عندهم كتير سبل للتوصل للمعلومات اللي بدهم اياها عن طريق التلفون، الإنترنت و الساتلايت.

المثال الثاني في نفس هذا السياق، كان اخضاع الصحافة الإلكترونية لقانون المطبوعات في بداية السنة. بدأ القانون و انتسى، و ما حدا كان عنده معلومات صحيحة او دقيقة عن هذا الموضوع.

و هذا الشي هو اللي بيخلق بلبله و تلبّك… لأنه بكل بساطة، ما حدا فاهم اشي.

عدم قدرة الشعب للوصول للمعلومات

لينا بنت على موضوع تواصل الحكومة. شاركت المجموعة بقصه، كانت من خلالها بتحاول تتوصل لمعلومات، و بالرغم من انه حاولوا يساعدوها، الا انه البيرقراطية كانت قاتلة. كان تساؤل لينا ليش ما تكون المعلومات متوفرة الكترونيا بالوقت المناسب، لأنه اليوم بطبيعة الحال المعلومات بتم توفيرها بعد 6 اشهر. لما يكون الوقت كتير متأخر.

عدم وضوح القوانين

ربى علقت على موضوع صعوبة القوانين و عدم وضوحها للمواطن العادي. كانت عم بتقول كمان انه القوانين فضفاضة، ما حدابكون فاهم وين بتبدأ و وين بتنتهي. و قالت انه اذا الحكومه استخدمت كلمات سلسه حتى الناس يفهموا القوا نين. بصير المواطن العادي اعلم و اعرف بحقوقه وواجباته. اقترحت انه نستخدم افلام او رسومات او الوان حتى يتم توضيح القوانين.

مصداقية الحكومه

كان هذا هو اهتمام ريم. كانت بتقول كيف انه المواطن الأردني فقد ثقته بالحكومة، بسبب الأخبار وتعامل الحكومه بعدم مصداقية احيانا. و كيف انه لازم الحكومه تاخذ المبادرة في اعادة بناء ثقة الحكومه عن طريق انه تركز على مصداقيتها.

الرقابة الذاتية و الخطوط الحمراء

وين هي الخطوط الحمراء؟ كيف بنعرف اذا اللي بنحكي فيه هو خط احمر او لأ؟ مين بيقدر يوضحها؟ محمد القاق، حكى عن الرقابة الذاتيه، و كيف انه عدم وضوح القوانين و الخطوط الحمراء بتخلق ثقافة الرقابة الذاتية. كيف انه المواطن الأردني بيخاف يحكي او يعبر بسبب ثقافه الخوف السائدة.

اشخاص فوق القانون

كانت النقطة اللي ذكرتها مبنية على كلام أحمد و مستنبطة من حالات العنف اللي عم بنسمع فيها مؤخرا. و النقطة هي انه في فئة شبابية بدأت تشعرانها فوق القانون اما بسبب العشائرية او التميز الإقتصادي من ناحية. و من ناحية اخرى في فئة بتقاتل حتى تحصل على ابسط حقوقها و منها حق المهارات و التعليم اللي عم بيفشل النظام الأكاديمي بتأمينها مما يعمق الفرق بين الفئات المختلفة في المجتمع. هدول هم شباب المستقبلو اذا الحكومة ما اتخذت خطوات صارمة حتى تخلق ثقافة عادلة بتشعر فيها جميع فئات المجتمع بسيادة القانون، رح يكون مستقبل الأردن قاتم.

دور الإعلام الجديد

حكى رمزي عن دور الإعلام الجديد في تحسين صورة الحكومه و التواصل مع الناس. حكى كيف انه اوباما عندة فريق كامل مهمته التواصل مع الناس و توضيح قرارات الحكومه عن طريق الإعلام الجديد مثل الفيس بوك و تويتر و غيره. و كيف انه هذا بيخلق ثقة و علاقة و اتصال ثنائي الأتجاه ما بين الحكومه و المواطنين.

من المقترحات:

1- وضع قانون الإنتخاب الجديد على الإنترنت حتى انه الشعب يشوفه و يعلق عليه و يخلق حوار حوله
2- استخدام وسائل الإعلام الحديث للتخاطب مع الشعب
3- ابقاء حرية التعبير المسؤولة للمدونين و الصحفيين.
4- التواصل المستمر و توفير معلومات للشعب و خاصة في القضايا الحساسة حتى لا يصير في البلبله في البلد.

هذه الأشياء اللي اتذكرتها هلأ. اذا اتذكرت اشياء تانية رح اضيفها.

اخر ملاحظة: رئيس الوزارة كتير لطيف

Mohanned

April 23rd, 2010 at 08:38 · Reply

يعطيكوا العافيه..بتفق معكو إنو كان لازم يكون في تنوع..وبلحظ إنو يمكن كان موضوع الإقتصاد وشفافيه القرار الإقتصادي يمكن كانوا غايبين. غياب المحاسبه وتحمل المسؤوليه وازدواجية الخطاب للدوله حيث الحديث للجمهور الغربي غير عن الحديث الموجه للجمهور المحلي..

Madas Reply:
April 24th, 2010 at 06:15

انحكى شوي عن الإقتصاد، الحقيقة كان التركيز على غياب الشفافية في خطاب الحكومة الداخلي. بعتقد اليوم هذي لازم تكون الخطوة الأولى. لسا الطريق طويلة لحد ما نوصل للخطاب الداخلي و الخطاب الخارجي.

hatem abunimeh

April 23rd, 2010 at 14:50 · Reply

يا عمي ، ألعز للرز والبرغل شنق حاله. ألمهم والله أ نا فكرت ومش عارف ليش انا هيك فكرت إنه واحد او وحده منكم حكى مع دولة ألرئيس عن موضوع ألأجندة ألوطنيه ، بس كنو ما حد فيكم جايب سيرتها. على كل ألأحوال تهانينا لكل المدونين ألأردنيين،هسه بنقول صار لنا ناس يمثلونا عند الحكومه، وبيني وبينك المجموعه الحاضره تمثل من وجهة نظري نخبه ممتازه من مدونينا

Madas Reply:
April 24th, 2010 at 06:13

عز؟ كان اللقاء ايجابي على عدة مضامير، و بتمنى انه الحكومه فعلا تبدأ توفر المعلومات للشعب الأردني، و توحد خطابها. انشاءالله يوخدوا بمقترح احمد بالإتصال الدائم مع قاعدة واسعة من المدونين الأردنيين اللي فعلا بمثلوا الأردن و ليس فقط مجموعة صغيرة. انا بعتقد ان هذي رح تكون الخطوة الأولى.
بالنسبه للأجندة الوطنية، ما كان الموضوع مطروح على الطاوله (بالنسبه الي على القليله) اللي بقلقني هذي الأيام هو العنف مش الطبيعي و تفتت الشعب الأردني بشكل مخيف. يعني القصة بطت فلسطيني اردني، صارت غني و فقير، شمالي و جنوبي، العائلة الفلانيه و العائلة العلتانية… و سيادة القانون.

April 24th, 2010 at 01:51 · Reply

eza el 7okome e5taratekom ento men ben 6 million! ay hada kafi enha 7okome sag6a! alllllll dueeeee respecccccttttt

Madas Reply:
April 24th, 2010 at 05:35

shukran hada min zo2ak.

April 24th, 2010 at 13:56 · Reply

مريم ،
أرجو تسليط بعض الضوء على ملاحظه نوه اليها مدون اللغة العربيه محمد وعمر وقوامها ن ألأجتماع مع دولة الريئيس يهدف الى محاولة تدجين مدوني اللغة ألأنجليزيه.

Madas Reply:
April 24th, 2010 at 20:41

والله يا استاذ حاتم، بعتقد انه نحنا نعشق ثقافة المؤامرة. من الممكن ان تطمح الحكومه الى تدجين مدوني اللغة الإنجليزيه، لكن هل يعني هذا انها ستنطلق بعد ذلك لتدجين مدوني اللغة العربية؟
برأيي انه اذا الهدف هو التدجين، فأن استراتيجية الحكومه ليست محكمه، لأنه الأولى البدء بمدوني اللغة العربية لأنه قاعدتهم الشعبية اوسع بكثير، و صوتهم مسموع اكثر و لديهم تعاطف شعبي اكبر ا
الجواب هو لا اعرف، اعتقد انه علينا سؤال محمد عمر ان يوضح نقطته. و شكرا للملاحظة..