الوضع في عمان الشرقية: حلقة مفرغة
يمكن أحس طريقة لأبدأ هدا الموضوع هي اني اعترف انة موضوع نخبوي! مع اني قضيت أربع ساعات أحاول افكر بطريقة لطرح أفكاري اللي ما كانت نخبوية لما فكرت فيها.
يلا:
بعد سنين من الشغل في عمان الشرقية، بلشت ألاحظ وجود ظاهرة بين الناس اللي اشتغلت معهم هناك. الظاهره هي انة عددالأشخاص في عمان الشرقية اللي عندهم مهارات جذابة لأصحاب الوظائف العالية كتير قليل. بالمهارات المناسبة ،قصدي الحد الادنى من المهارات!
اسمحوا لي أعطي مثال، حتى أوضح الأمور؛ في واحد من المشاريع اللي اشتغلت عليها قبل كم سنة، اشتغلت معي محاسبة ممتازه. كانت دقيقة كتير بشغلها ، بتنتبه على التفاصيل الصغيرة، و مرتبة كتير بتنظيم الوثائق والملفات. كنت أسألها عن أي ورقة عشوائية و انا عارفة انها بتقدر تعطيني اياها خلال دقائق.
بس طبعا ما في اشي كامل، المحاسبة كانت عندها مشكلة صغيررررررة ، مشكلتها هي اللي بنسميها بالبلدي”لسانها طويل” كانت تعطي الأرقام والمعلومات المهمة لكل الناس. الحقيقة، وعشان الحلال و الحرام انه هي ما كانت تحكي لأنه لسانها طويلة، ولا لأنها كانت سيئة. كانت تحكي لأنه هدا هو التصرف الصح بالنسبة لإلها. بكل بساطة، هدي البنت ما كانت تعرف مفهوم المعلومات السرية.
من منظورها ، الاموركانت بهدي الطريقة : الناس اللي كانت تشتغل معهم هم جيرانها وأصحابها. وعلاقتهم فيها حكي، و ضحك و ثقة. بساعدوا بعض، و بيحكوا اسرار. مشاركتهم بمعلومات الشغل هوالشي الطبيعي و الصحيح بالنسبة لإلهم.
هدي المحاسبة ما راحت على مدرسة ثانوية بعلّموا فيها الأخلاق الحميدة أو الممارسات الصحيحة ، أو حتى مبادئ المهنية و الإحتراف المهني. بالحقيقة، هي حتى ما كمّلت دراستها الجامعية (البكالوريوس) و السبب : الفقر ؛ و مع هيك استطاعت انها تحصل على دبلوم من شي كلية المجتمع. شطارتها منها لحالها.
كل ما بتذكرها، بحزن كتير. بتذكر انه راتبها حوالي 200 دينار ، مع انه هي كتير مميزة و مؤهلة لألف دينار اكتر من راتبها الحالي … بعرف انه لو صحتلها فرصة تعليم مناسبة في عالم موازي، كانوا احسن الشركات الأردنية رح يلاحقوها. في هدا العالم الموازي ، أولادها ما رح يكونوا محرومين
من الإحتياجات الأساسية، و منها مياه الشرب. ما رح يكونوا يعانوا من سوء التغذية ، و ما يروحوا للمدارس السيئة اللي هي راحتلها. و بالتالي ما رح يعيشوا نفس أسلوب حياتها.
عارفة حالي cliché ، بس انا بلوم نظامنا التعليمي. نظامنا التعليمي عم بيفشل بإنتاج قوى عاملة مؤهلة أو ماهرة. الافتراض اللى عم بفترضه هون هو أنه الناس (خلونا نحكي عن الناس اللي اشتغلت معهم من شرق عمان، مش كل الناس) ما بيقدروا يروحوا على مدارس خاصة جيدة. (و كلنا بنعرف انه المدارس الثانوية هي في غاية الأهمية لعالم الشركات الأردنية. في أي مقابلة ، إذا اثنين عندهم نفس المهارات، وواحد خريج مدرسة حكومية، بينما التاني خريج مدرسة خاصة ، فخريج المدرسة الخاصة بيأخذ الوظيفة.) المهم انه بآخرالنهار، رح يروحوا على مدارس حكومية سيئة. و للأسف نظام التعليم الأردني العالي مش كتير أحسن. يعني، بالجامعة بنتعلم الاشياء التقنية أو الفنية، بس ما بنتعلم المهارات الإنسانية. اذا واحد ما بيحكي انجليزي،ما رح يتعلم يحكي انجليزي بأي جامعة أردنية. واذا ما كان بيعرف يعبر عن حاله ، فما رح يتعلم بأي جامعة أردنية. و خلينا نحكي بشفافية، إذا ما كان بيعرف كيف يكون مظهره لائق لمقابلة ، فأكيد ما رح يتعلم بأي جامعة أردنية كيف يلبس و يقعد و يجاوب على الأسئلة.
خليني اتراجع شوي لَوَرا، لأني ما بدي اوقع بفخ الاستشراق هون. الغرب بيعرف شو الأحسن للشرق، كل اللي بقوله هو انه من منظور أنثروبولوجي، الأمور بتبدو بهدي الطريقة: إذا كنت فقير، بتروح على مدرسة سيئة ، واذا رحت على مدرسة سيئة ، رح يكون شغلك سيئ ، وإذا كان شغلك سيئ، فأنت محكوم عليك تعيش بفقر، وإذا كنت فقير، الكل بيعرف اللي بصير.
الا طبعا اذا كان في تدخل إلهي، و الواحد اخترعله شي اختراع. أو اذا كان محظوظ و طلع من حظه استاذ او معلم مميز وَجَهُه بطريقة صحيحة، و كان السبب في انه يطلع من هدي الحلقة المفرغة. و قتها ببطل من 14.2 ٪ من الاردنيين الذين بعيشوا تحت خط الفقر ، وأطفاله ببطلوا من 17 ٪ اللي بيعانوا من سوء التغذية.
حلو الموضوع إلي ناقشتيه..
أنا بمنظوري بشوف إنو الواحد ممكن يطور نفسو بنفسو.. أنا خريجه مدارس حكومية ودرست أدب إنجليزي بالجامعة الأردنيه.. أنا معاكي إنو أول سنه كانت بالنسبه إلي صعبة.. وإنو أشياء كنت أستصعبها غيري -من خريجين المدارس الخاصة- ماياخد الموضوع معهم أكثر من دقيقتين.. بس اشتغلت على حالي وكنت أضل أروح على مركز اللغات وأحكي مع الطلاب الغير عرب وقويت لغتي وفرقت منيح عن أول..
برضو مثال تاني.. أنا محد علمني على Microsoft Office
أنا درست نفسي بنفسي.. يعني حتى مارحت على معهد.. كنت أول ما أشوف اكسل وورد بكتئب عشان ما بعرف اشي فيه ولا بفهملو.. وهلأ الحمد لله بسوي أية اشي بدك إياه عليه..
في أمثله كتير وبصفي الموضوع إنو الواحد لازم يستغل أية فرصة بتصحلو عشان يطور حالو ويتعلم اشي جديد..
وتسلم إديكي على هالبوست الحلو..
Reply
Madas Reply:
March 18th, 2010 at 07:10
بقدر اقنعك تيجي تعطي محاضرة صغيرة لطلابنا عن قصتك؟
Reply
موضوع حلو وفي مكانه
بس شخصيا اتعاملت مع بنات من عمان الشرقيه
المشكله مش في التعليم بس
المشكله بالخلفيه كمان
يعني لما وحده تكون خلفيتها اخ مدمن و دوره من كليه من غير شهادة توجيهي
وتشتغل مديره مكتب لشركه امريكيه شي 5 سنين على راتب 250 دينار
وبالاخر بيروحوها بكل بساطه
صعب تتحسن اكتر من هيك
Reply
Madas Reply:
March 18th, 2010 at 07:11
يعني هذي مشكله كتير كبيرة. كيف بدهم يتحسنوا اذا ما انعطوا فرصة؟
Reply
Now this was a v good read indeed! thanks a lOt.
H.
Reply