مقاومة الضعفاء-الذكرى الأولى للحرب على غزه
كانت ايام حرب غزة كتير عصيبة السنة الماضية. كان الغضب بيعترم الشوارع الأردنية. كان عندنا شعور بالقهر و الظلم. و عرفنا انه الشعب الفلسطيني كان ضحية للعبه سياسيه قذرة، متعلقة بالإنتخابات الإسرائيلية
طريقة مقاومتنا ، كانت طريقة الضعفاء. ما بنقدر نغير الواقع بس بنقدر نعمل شي صغير. مش مهم اذا كان مفيد أو لا، المهم انه نعمل اللي بنقدر عليه، و ما نستسلم.
نحنا اخترنا نجمع أكل و ملابس لأهل غزة. و يمكن الطريقة اللي اشتغلنا فيها هي دليل على انه مقاومتنا هي مقاومة الضعفاء! (رح أكتب أكتر عن نظرية مقاومة الضعفاء بمقال تاني بس مش مهم. وضعنا اعلان على حبر انه اللي بحب يتبرع، بيقدر يلاقينا عند كوزمو.) و اتفقنا ننقل الأغراض بسيارة نسيم لبيته، و نطلب من مجموعة من اصحابنا يساعدونا، ونسهر طول الليل نرتبهم بأكياس.
و يا ليلي
اللي ما حسبناه، هو قوة الضعفاء اذا اجتمعوا. مئات الناس اذا مش الاف جاؤا يتبرعوا بأكل و ملابس، و عشرات الناس ما بنعرفهم من الشارع و قفوا يحملوا معنا أغراض و يساعدونا بتحميل الأغراض.
استبدلنا سيارة نسيم ب16 شاحنة من ارامكس، و الأكياس بكراتين من نقل. و زدنا على مجموعة اصحابنا مئات من المتطوعين استبدلنا ليلة السهرة للشغل بثلاثة أسابيع من السهرات، و بيت نسيم بمستودع على طريق المطار. كنا كتير ننبسط لما نعرف انه الغرض اللي بنترتبه اليوم، بعد بيومين بصير بغزة. كيف بنعرف؟ كنا نعلّم الأغراض، و الناس يتركوا رسائل دعم في الكراتين ، و بطريقة أو بتانية قدرنا نتصل بالشخص المسؤول عن استلام المساعدات بغزة و بتأكد.
بس بعدين بدأ النهب على الطريق و انحرق المستودع… و عشان هيك انا بسميها مقاومة الضعفاء! بس مرة تانية مش مهم… المهم انه كان في حراك في الشارع الأردني.
و بمناسبة الحديث عن الحراك، هذه مجموعة من الفيديوهات من ايام غزة مأخوذة عن من الأردن
11 كانون الثاني هذه كانت تظاهرة فنية، تضمنت برنامج كتير مؤثر فيه موسيقى بالات مختلفة، و شعر بالعربي و الإنجليزي.
9 كانون الثاني – هذي في الرابية، اقرب مكان قدروا المتظاهرين يقربوا للسفارة الإسرائيلية. قرروا انه بدهم يعملوا
اعتصام مفتوح لحد ما يطلع السفير عن الأرض الأردنية
8 كانون الثاني- اعتصام للقوى الشبابية والطلابية أمام المفوضية الأوروبية احتجاجاً على موقفها من الهجوم على غزة
هذه المظاهرة بدأت عند الدوار الرابع و انتهت عند السفارة المصرية. كان الموضوع غضب على مصر عشان معبر رفح. بس الأهم من هيك هو انة الرئيس المصري كان في اجتماعات مع اسرائيل قبل الهجوم
هذه أنا بسميها مظاهرة الفيس بوك، كانت في الشميساني، بشارع الثقافة و ضمت المظاهرة رسامين و فنانين. هم ساعدوا في تحضير اللافتات اللي حملوها المتظاهرين. كانت المظاهرة كتير خلاقة
Recent Comments