wordpress stat
Share

StatPress

Visits today: 0
2,369 views

وصايه الحكومه و مؤسساتها، هل تنتج مواطنين قاصرين ابديا


الدافع الاساسي وراء كتابة موضوع وصاية الحكومه على أخلاق المواطنين هي مجموعة الخطوات اللي اتخذتها
الحكومه الاسبوع الماضي لحماية المواطنين ومنها اعلان وزيرالاتصالات عن حجب المواقع الاباحية بهدف حماية أخلاق المواطنين. و تسوير الدوار الرابع بهدف حماية مصالح المواطن وغيرها من الاحداث و التي اخذت شكل الحمايه.

بالنسبة الي، الفكرة اللي حيرتني هي مش رغبة الحكومة بفرض الوصايه على المواطن لحمايتهم، و لكن هي رغبه المواطنين بفرض الحكومه وصايتها عليهم. وهون هو بيت القصيد. من الواضح للجميع، انه الحكومة ومؤسساتها من القطاعات المختلفة الهم الحق في مساعدة المواطن في حماية نفسه وجيرانه و كل مواطني الاردن من أي تصرفات قد تكون مؤذيه، حتى لوكان من أنفسهم، طبعا برضى وموافقه المواطن، بل حتى بطلب منه في بعض الاحيان مثل ما صار في حالة حجب المواقع الالكترونيه.

الاسئلة اللي بتطرح نفسها هي كيف بتتجلى اشكال هاي الحمايه أو الوصايه؟ و شو تداعيات هذه الوصايه على المواطن؟ و شوهي الاسباب والمعتقدات اللي شكلت فهم المواطن الاردني لطبيعة الانسان ولقوانين الدوله و اللي خلته يسلم حقه بحمايه نفسه للدوله و مؤسساتها المختلفه؟

خلينا نبدأ بالسؤال الأول و هو تجليات أشكال الحمايه. فكرة دور الدولة أو السلطة، بغض النظر مين بتمثل، مزروعه زرع في راس المواطن الاردني. بنشوفها في البنك و في المول و في المدرسة و الجامعة… في كل مكان تقريبا. الامثلة كثيرة حولنا، بحب أعطي مثال عشوائي تماما؛ احد المولات في الاردن. بالرغم من وجود ابواب في كل مكان في المصفات اللي تحت الارض، و اللي ممكن انها تسرع حركة المواطن لداخل و خارج المول، و تقلل من الازمه المجنونه. وبالرغم من انه وجودها مهم جدا في حال صار حريق لا سمح الله، الا انه هاي الابواب مغلقة وفي كل مكان في لافته بتقول: “الرجاء استخدام المدخل الثاني” فبدخل المواطن من تحت آله بتزمر كل مرة، بس الصوت ما بخلي شباب الحماية الواقفين حتي يرمشوا، وظيفتهم مش كثير واضحة، و لكن هي بتتلخص بفتح شنطات السيدات. الهدف طبعا هو حماية المواطن…من شو؟ مش معروف.

مثال عشوائي ثاني هو البنوك. في أي بنك أردني ما بتقدر تستخدم الانترنت حتى تنقل مصاري من حسابك لحساب شخص اخر. ان كنت حابب تعمل هاي الحركه، فما الك الا انك تزور البنك، بالرغم انه فكرة زيارة البنك هي عبارة عن كابوس بسبب المواصلات و الدور الطويل. ولكن لازم نتذكر انه القيود المفروضة هدفها حماية مصالح المواطن، حتى لو على حساب وقته. وشو قيمة وقته مقابل مصاريه؟

و هذه الامثله هي فقط أول اثنين خطروا على بالي. ولكن اذا القينا نظرة حولنا بنجد انه هناك هوس من قبل مختلف المؤسسات الحكومية و الخاصة بحماية المواطن عن طريق تنظيم أموره وأعماله و حتى سلوكه و أخلاقه. لدرجة اني بشعر انه بتم معاملة المواطنين كـأنهم قاصرين في كل خطوة من خطوات حياتهم. فما بجد غير تعبير “قاصر أبدي” حتى تصف اي مواطن أردني بغض النظرعن درجة تعليمه أو نسبة ذكاؤه أو مكانته الاجتماعيه. من أكبرنا لأصغرنا بنبقي قاصرين و بنحتاج لوصايه من قبل المؤسسات المختلفة في الأردن. بالرغم انه اي واحد فينا مهما صغر شأنه أو علا، لما يسافر لخارج الاردن بضطر انه يكون وصي على نفسه و على اخلاقه وامور حياته.

والطرافة بتيجي من انه القصور الابدي ما بيجي بلا ثمن. لما الانسان بسلم مسؤوليته الشخصيه في تسيير أمور حياته لجهة معين، بسلم معها مسؤوليته في تحمل العواقب، فبنصير كأفراد بحاجة لرقيب و شرطي على كل شارع وكل زاويه و كل خطوة من خطوات حياتنا. و يمكن هذ بفسرازدياد نسبة الجريمه في الاردن، بحيث انها زادت بنسبه ١٧٪ في لاردن لعام ٢٠١١، 
بينما قلت بنسبة ٦٪ في كندا لنفس العام الفرق بينا و بينهم انه نحنا خاضعين لوصاية حكوماتنا وهم اوصياء على أنفسهم. طبعا هذا بدون مخالفات الشوارع و القيادة و اللي بتحكي عن حالها و ما في داعي لأي شرح.

حتى أقدر اجاوب على السؤال الاخير بتحضرني كلمه “هيجوموني: و هي كلمه اغريقيه معناها الوصاية على منطقة سياسية جغرافيه معينه بدون حكم عسكري. في القرن العشرين قام مفكر ايطالي اسمه انتونيو غريمشي بتطوير فلسفة الهيجوموني الثقافيه، و اللي وضح من خلالها قيام طبقة اجتماعيه أو سياسيه معينه باستخدام الاخلاق للتلاعب بمبادىء المواطنين و اخلاقهم في سبيل تأسيس طبقة حاكمة مسيطرة. ممكن تكون سيطرة سياسيه او اقتصاديه أو اجتماعية.

بتقوم هاي الطبقة بوضع سياسات معينه عن طريق الاستماله واعطاء الخدمات والدفع، او التلاعب، واستخدام اسلوب التخويف، أو حتى استخدام التعاطف وطبعا أهم كرت هو كرت الاخلاق في سبيل السيطرة. هذه السياسه الها مصطلح محدد و هو “القوة الناعمة” و اللي طلع فيها مفكر اسمه جوزيف ناي.

يعني للاجابه على السؤال، لازم نرجع لنقطة الاساس وراء وجود حكومه أصلا. لازم نتذكر انه الحكومه بتستمد شرعيتها من الشعب. بالتالي ما بتقدر تتصرف بدون اذن الشعب، ولتنظيم علاقة الشعب مع المواطنين، انوجدت الدساتير. و قامت هاي الدساتير بوضع اساسيات اخلاقيات التعامل في مؤسسات الدوله. و بهاي الطريقة وجد المواطنين طريقة حتى ينجمعوا تحت مظلة واحدة. لكن هذي الحكومات و المستفيدين من نظام الدوله، بينسوا في بعض الاحيان دورهم الاساسي و بيبدأوا باستغلال سلطتها في تحديد أخلاق معينه على الأفراد عن طريق القوة الناعمه ، الاخلاق اللي بتضمن بقاء هاي الحكومة في السلطة. لضمان هذه النتيجة، قدرة المواطن انه يقرر او يحمي نفسه بنفسه و حتى يكون وصي على نفسه غير مناسبه و بالتالي يجب تحديدها و تنظيمها.

هذا الفكر انعكس في نظام التعليم وفي السياسات اللي بتحكم المؤسسات المختلفة. و مع الوقت بدأ المواطن يشعر انه لازم تكون هناك سلطة بتحميه و بتسير اموره، و غير عن هيك رح يصير في مشاكل كبيرة. بينسى المواطن انه هو عم بكون ضحية لتلاعب فئات معينه، هدفها تخدم مصالحها.

فهل فعلا نحنا بنحتاج لوصاية الحكومه؟
Share
3,141 views

كيف يعاقب مجتمعنا ضحايا التحرش الجنسي

بعتقد انه مجتمعنا وصل لمرحلة من الوهم بتخلي الواحد يضحك. على قولة المثل “شرالبلية ما يضحك”. قصة اليوم عن الفيديو اللي نشرته حبر  و كانت مجموعة من الفتيات في الجامعة عملوه حتى يعترضوا على ظاهرة التحرش الجنسي اللي وصلت لوضع مقلق في البلد.
كان طرح البنات جريء، بالرغم انه كان في قمة [...]

Share
1,976 views

لماذا تحذر بعض النساء حكم السلفيين؟

 

 
قبل كم يوم طلبت من نسيم انه يوصفلي صورة بتمثل الفرق ما بين كلمة ” اوكسيمورونك” و كلمة “أيرونك” في اللغة الإنجليزية. لما شفت هاي الصورة اتحيرت. بالنسبة الي هي بتمثل الكلمتين مع بعض! فهي فيها تضاد واضح و هي الكلمة الاولى اوكسيمورونك و ساخرة  لحد الضحك و السخرية موجودة في كلمة أيرونك.

[...]

Share
1,836 views

وين رايجين في الاردن؟ فصل سيده مسيحيه من عملها لرفضها ارتداء غطاء الرأس

قرأت خبر اليوم على الفيس بوك بخليط من الاستغراب والغضب. الخبر بدور حول سيدة مسيحيه انفصلت من عملها بالرغم من ان الها 25 سنه في العمل، لأنهم قرروا انه يفرضوا غطاء الرأس كجزء من اليونيفورم و هي رفضت انها تلبسه كونها مسيحيه.
بداية، عندي مشكله في موضوع فرض الحجاب على الجميع كمبدأ [...]

Share
5,536 views

هل فعلا نريد حجب المواقع الاباحية؟

تأييد أمين عام وزارة الاتصالات وتكنولوجيا المعلومات الدكتور خالد اللحام لفكرة حجب المواقع الإباحية في الأردن أثار عدة تساؤلات و أفكار في ذهني.
صراحة ما رح أخوض بالحوار اللي بؤيد الطرح، لأنه الأسباب مفهومة وواضحة. بدي أخوض بالطرح المعاكس و خاصة انه مش كثير واضح ليش ممكن يكون في ناس بدافع عن [...]

Share
2,040 views

كيف نظام التعليم خذل شباب صف ثامن

رجعوا الاولاد للمدارس! و رح أضيف كلمة حمدلله.
و بالرغم إني كثير سعيدة بالنتائج اللي أنجزها المعلمين. و كنت داعمة للاضطراب قالبا و مضمونا، لأنه صار وقت انه المواطن الأردني يتضامن و يطالب بحقوقه. والأفضل من هيك انه هذا كان هذا جهد شعبي، فيه تعاضد كامل من جميع فئات الشعب بغض النظر عن أصولهم و [...]

Share
2,975 views

غضب تونسي على الشيخ وجدي غنيم بسبب موضوع ختان البنات

الصبح، كنت بستمع الى الراديو و اسمعت عن غضب الشارع التونسي بسبب زيارة الداعية المصري السلفي وجدي غنيم و اللي راح لتونس حتى يحاضر في مجموعة من الأمور. وجدي غنيم معروف بالفتوى التي أحدثت ضجة وبلبلة بخصوص ختان البنات اللي يعتبره “مكرمة وعملية تجميلية”!
حاولت أعرف أكثر عن موضوع ختان البنات و اكتشفت [...]

Share
40,251 views

غياب الثقافة الجنسية، أسعار محددات النسل والعلاقة ما بين الوضع الاقتصادي وعدد الاطفال

كنت بسمع الراديو قبل كم أسبوع و كان محمد الوكيل عم بأنب أحد المواطنين لأنه عنده 22 أو 28 طفل و هو على باب الله. و بالرغم إني بتفهم من ويم جاي محمد الوكيل (بس في هذي الحالة، لأنه في كنير حالات ما بقدر أفهم عليه ولا شو بده)، محمد الوكيل لفت [...]

Share